Эссенде мыңдаған жаңа электромобиль қаңтарылып тұр

Volkswagen және Audi брендінің 6000-ға жуық жаңа электрокары Эссен қаласындағы үлкен сақтау алаңында тұр. Бұл туралы Bild хабарлады. Неміс автоконцерндері машинаны осы жерден дилерлерге жөнелтетін. Ал қазір ол алаң толып тұр, қызметкерлер бұрын-соңды мұндай жағдай болмағанын айтты.

Тұрақтағы автомобильдердің көбі алты айдан бері, кейбірі тіпті бір жылдан бері осында тұр. Кем дегенде 300 млн еуро тұратын қымбат актив күннен күнге тозып барады.

Мұның басты себебі — Еуропадағы электромобильге сұраныс автоөндірушілер болжамынан әлдеқайда төмен болып шықты. Оның үстіне сатып алушыларға электрокардың дәстүрлі мотормен жүретін машинаға қарағанда едәуір қымбат тұратыны ұнамайды.