Ескі Toyota мен Lexus ең сенімді көлік атанды

Consumer Reports басылымы 5-10 жастағы сенімді көлік бойынша өз рейтингін жариялады. Талдаушылар тізімге 26 бренд қосты. Көш басында Lexus және Toyota тұр.

Жапониялық премиум бренд 100-ден 75 балл жинады. Екінші орындағы Toyota 3 баллға қалып қойды. Үшінші орынға 59 балл жинаған Mazda жайғасты. Алғашқы бестікке Acura мен Honda кірді.

Lexus бренді IS, ES, GS және LS модельдерінің, сондай-ақ UX, NX, RX кроссоверлері мен GX жол талғамайтын көлігінің сенімділігіне жүргізілген зерттеулердің арқасында алға шықты. Toyota көрсеткішіне Corolla, Camry, Prius және Avalon, RAV4 пен Highlander, сондай-ақ 4Runner, Tacoma және Tundra секілді автомобильдердің көрсеткіші әсер етті.

Consumer Reports шешімі бойынша ең сенімді 10 бренд

Басылымның хабарлауынша Lexus және Toyota көліктері тұрақты сенімділік көрсеткішіне ие. Олар жаңа және қолданыста болған көліктердің рейтингтерінде үнемі жоғарғы орындарды иеленіп отырады. Басқа брендтерде мұндай көрсеткіш төменірек. Мысалы, Tesla-ның жаңа электрокарлары тізімнің ортасынан орын тапса, қолданыста болған автомобильдер арасында соңғы орындарда табылды. Басылым мұны Tesla жаңа модельдерді он жыл бұрын нарыққа шығара бастаған және олар уақыт сынынан өтпеген деп түсіндірді. Mercedes-Benz-пен жағдай керісінше — жаңа көліктер сенімділік жағынан 29-орында тұрса, қолданыста болғандары 10-орында, бұл брендті Еуропаның ең жоғары бағаланған премиум бренді етеді.

Талдаушылар қолданыста болған автомобильді таңдау кезінде нақты модельдің шыққан жылын ескеріп, жеке рейтингіне назар аударуды ұсынады. Өндіруші енгізген жақсартулар белгілі бір модельдің сенімділігіне айтарлықтай әсер етуі мүмкін.