Cars & Bids аукцион порталы жақында бірінші буындағы Toyota Celsior көлігін аукционда сатты. Модель біздің елде аса танымал емес. Kolesa.kz-те 24 данасы ғана сатылып жатыр, оның бәрі көліктің екінші буыны.
Celsior Lexus LS-тің оң рөлді егізі саналады. Машина 269 ат күшіне ие 4 литрлік V8 1UZ-FE арқылы қозғалады. 362 Нм момент 4 сатылы автомат арқылы артқы дөңгелектерге беріледі.
«Цельсиор» мен LS-тің негізгі айырмашылығы — Toyota белгісінен бөлек салон қаптауында. Lexus былғары орындықпен ұсынылса, Celsior орындығы тоқыма матамен қапталған. Седанның артқы орындығына массаж функциясы опция ретінде орнатылады. Америкалық LS-та мұндай жоқ.
Бұл Celsior — қосымша F-пакеті бар ең үздік жиынтықтағы машина. Оған массаж функциясы бар артқы орындық, теледидар, бөлек климат-бақылау және ауа тазарту жүйесі кіреді.
Седан 28 жылда 11 мың шақырым да жүгірмеген. Одометрі 10 520 шақырым көрсетіп тұр, осыған қарап оны жаңа деуге болады. Төрт есікті седан фотосуретте де жаңа көрінеді.
Celsior-дың бәс саудасы аса қызғын болған жоқ. Бірнеше күнде клиенттер 30-ға жетпейтін баға ұсынып, соңында 17 000 долларға тұрақтады, бұл көп жүрмеген машина үшін аса жоғары баға емес.
Комментариев: 0