RM Sotheby’s аукцион үйі аса сирек кездесетін Toyota 2000GT моделін сатты. Көлік 1967-1970 жылдар аралығында шығарылған. Ол кезде екі есікті машина Porsche 911 мен Jaguar E-Type-тан 1000 долларға қымбат болатын. Жалпы бұл көліктің 351 данасы жарық көрді, оның тек 62-сі ғана сол рөлді.
Купе 150 ат күшін беретін 2 литрлік алты цилиндрлі мотор арқылы қозғалады. Айналу моменті 5 сатылы механика көмегімен артқы дөңгелектерге беріледі. Машина жылдамдығын сағатына 217 шақырымға дейін арттырады.
Аукционда сатылған 1967 жылғы темір тұлпардың шанағындағы MF10-10100 жазуы оның жүзінші болып шыққанын білдіреді. Көліктің алғашқы иесі — Отто Линтон есімді танымал шабандоз әрі Toyota дилері. 2000GT оның гаражында 30 жыл тұрған. 1998 жылы Линтон спорткарды басқа дилерге сатады. Ол көлікті қайта қалпына келтіріп, түрлі көрмелерге қатысқан. 2010 жылы 2000GT жаңа иесімен Copperstate 1000 ретро-раллиінде бой көрсетті.
Купе 25 қазан күні бәссаудаға түсті. Мамандар машина 850 мың долларға өтеді деп болжаған, бірақ соңында 912.5 мың долларға сатылды.
Комментариев: 0