Bring a Trailer аукцион порталына 2003 жылғы бес есікті Hyundai Elantra шықты.
Машинаның тарихы 20 жылға жуық уақыт бұрын басталған. Оны сатып алған қарт кісі көп тізгіндемепті, сондықтан GT комплектациялы хетч өмірінің көп бөлігін гаражда өткізген, кейін қазіргі иесінің қолына өтіп, ақыры аукционға шықты. 2003 жылдан бері көлік одометріндегі көрсеткіш небәрі 5356 мильге жетті.
Сырттай машина мінсіз көрінеді. Артқы бампер мен дөңгелек аркасындағы бір-екі сызат қана сәнін бұзып тұр. Elantra-ның салоны да жақсы сақталған. Орындықтары былғарымен қапталыпты. GT нұсқасының басқа ерекшеліктері ретінде анағұрлым қатты аспа, тұманға қарсы шамдар, жеңіл балқытылған диск және люк пен Kenwood аудиожүйесіне тапсырыс беру мүмкіндігін атауға болады.
Elantra GT 135 ат күшіне ие 2 литрлік бензинді мотор арқылы қозғалады. 179 Нм момент 5 сатылы механика арқылы алдыңғы дөңгелектерге беріледі.
«Элантраның» саудасы 2000 доллардан басталды. Материал жарияланған уақытта баға 6.8 мың долларға жетіп қалды, әлі де ұсыныс түсіп жатыр. Айта кетерлігі, 2003 жылы бұл модельді дилерлер 15 074 долларға бағалаған.
Kolesa.kz-те жасы шамалас «элантралардың» құны 1.3-3 млн теңге аралығында. Ал ең қымбаты 4.7 млн тұрады.
Комментариев: 0