BYD концерні FangChengBao (Leopard) топтамасына тағы жаңа модель қосады. Бейжің автосалонында концепт ретінде көрсетілген сериялық Leopard 3-тің суреттері жарияланды. Жаңа өнімнің әртүрлі жағдайда пайдалануға арналған үш нұсқасы болады әрі 5 пен 8 индексті үлкен «леопардтарға» қарағанда құрылымы мүлде басқа.
Барлық Leopard 3 жақсарған дөңгелек аркалары, үлкен бастырық пен рейлинг арқасында жол талғамайтын көлік тәрізді көрінеді, бірақ кроссовердің сұсты имиджі модификациясына қарай әртүрлі болады. Суреттегі ақ Leopard 3 қалада жүретін сияқты, себебі ұстамды көрінеді. Қара түсті нұсқа ірі бамперімен және қорғаныш жапсырмасымен ерекшеленеді. Бұл модификация қаладан тыс сапарды ұнататындарға арналған болса керек.
Сұр-жасыл кроссовер ерекше стильде жасалған. Ол алдыңғы бөлігінде үлкен тік ендірмелері бар өзіндік бастырықпен, балшыққа арналған шиналары бар бірегей дөңгелектермен және шатырда орналасқан экспедициялық жүксалғышпен жабдықталған. Алдыңғы екі нұсқаның бесінші есігінде жүксалғыш бокс болса, бұл көлікте оның орнында қосалқы дөңгелек тұр. Бұл модификация асфальт жоқ жерде саяхаттайтындарға лайық болуы мүмкін.
Оффроудтық имиджіне қарамастан Leopard 3 құрылымы жағынан стандарт кроссовер. Өлшемдері — 4605×1900×1720 мм, дөңгелек базасы — 2745 мм, кіру және шығу бұрышы — 25 және 28 градус.
5 және 8 индексті жол талғамайтын көліктер гибрид күштік құрылыммен жүреді, бірақ Leopard 3 тек электромобиль ретінде нарыққа шығады. Ол 422 ат күшін беретін екі электрлі мотормен жабдықталады, алғашқы жүздікті 4.9 секундта еңсереді. Агрегат литий-темір-фосфатты батареядан қуат алады, бірақ сыйымдылығы әлі белгісіз.
Интерьер суреттері де жарияланбаған, бірақ Қытайда бастапқы бағасы шамамен 220 мың юань (шамамен 13.7 млн теңге) болатыны белгілі.
Комментариев: 0