Елорда әкімі Алтай Көлгіновтің айтуынша, көпір құрылысы 2023 жылы аяқталады. Ол Мәңгілік ел даңғылындағы көлік жүктемесін 20 %-ға дейін төмендетеді. Ұзындығы — 910 метр, ені — 36 метр, сегіз жолақты болады. Бұрын жарияланған эскизге сәйкес, көпір үстіндегі шамдар масақ түрінде (тың игеруді еске түсіру мақсатында) жасалады. Ал көпір астына балалар және спорт алаңдары салынады.
«Қазір барлық мәселе шешіліп, көпір құрылысы басталды. Бұл көпір Тәуелсіздік даңғылы, жаңа теміржол вокзалы ауданы, Әзірет Сұлтан мешітінің маңы, Қошқарбаев даңғылы, Нәжімеденов, Байтұрсынов, Қордай, Айнакөл көшелері, Момышұлы даңғылының сол жағалауымен қосымша байланысты қамтамасыз етеді», — деп жазды Алтай Көлгінов Instagram парақшасында.
Ұлы дала даңғылында да көпір салынып жатыр. Ол Мәңгілік Ел даңғылы, Ж. Нәжімеденов, А. Байтұрсынов, Р. Қошқарбаев көшелері, Nova city жаққа және «Мыңжылдық» аллеясына қатынауды жеңілдетіп, «Нұрлы жол» вокзалы, Телман елді мекені, Метро гипермаркеті маңы, Промышленный елді мекені, Жұмабаев даңғылы, Жүргенов көшесін және т. б. қолжетімді етеді.
Комментариев: 0