Электромобильге арнайы белгі тақпай жүруге бола ма

Бүгін ҚР ІІМ Әкімшілік полиция комитетінің төрағасы Қайсар Сұлтанбаев электрокарға арнайы белгі орнату керек екенін еске салды.

— Мұндай белгі орнатпағандар Әкімшілік кодекстің 620-бабына («Жол қозғалысына қатысушыларға қойылатын өзге талапты бұзу») сәйкес жазаланады. Бұл бап бойынша бірінші рет ескерту жасау, тағы қайталаса, 3 АЕК (2024 жылы 11 мың теңге) айыппұл салу жазасы көзделген. Бұл белгіні электрокар иелеріне ыңғайлы болу үшін ұсынып отырмыз, өйткені өзге көліктер тұруға болмайтын арнайы қуаттау орындары бар. Біздің инспекторлар тез тануы үшін электрокарға арнайы белгі орнату қажет«, — деді комитет басшысы.

Мұндай белгі орнату талабы электромобильге ғана қатысты. Гибрид машина жасыл жапсырмасы болмағаны үшін жазаға тартылмайды. Өйткені жол ережесінде «электромобиль — электромотормен жүретін, аккумулятор батареясынан және (немесе) отын элементінен энергия алатын, тек электр энергиясынан қуат алатын механикалық көлік құралы» деп жазылған.