Mercedes-Benz электрлі G-Class-тің (EQG) өндіріске дейінгі нұсқасының сырт пішінін көрсетті. Бірақ экологиялық көліктің кескіні ІЖҚ орнатылған «туысынан» аса өзгеше емес. Бұл да бұрынғы гелик секілді, бірақ радиатор торының орнына қойылған жарық шашатын қақпақша, бүйіріндегі LED-элементтер, төбесіндегі қосымша жарықдиодты шам, жүксалғыш есігіндегі аксессуар қорабы және 22 дюймдік дөңгелегімен ерекшеленеді.
Прототиптің техникалық жағы туралы ақпарат аз болғанымен, кейбір мәлімет бізге белгілі. Машинаның рамасы мен артқы жағындағы қиылмаған белдік сақталады, сондай-ақ жол талғамайтын көлікте бірден төрт электромотор болады. Компания мәліметіне сенсек, қозғалтқыштар «дөңгелектерге жақын» орналасады, әрі бір-біріне тәуелсіз жұмыс істейді. Мотор қуаты екі сатылы беріліс қорабы арқылы беріледі. EQG-дің жүріс қоры қанша болатыны қазірше белгісіз.
Комментариев: 0