Қазір Қазақстанда 5 мың шақырымға жуық тас жол (1 қарашада ақылы болатын жол бөліктерін қосқанда) ақылы. Жаңа жол бөліктерінен ақы алу кезең-кезеңімен енгізіледі. Алдымен бірінші категориядағы жолдар ақылы болады. Индустрия және инфрақұрылымдық даму вице-министрі Берік Камалиевтің айтуынша, ведомство 2025 жылға қарай 11.7 мың шақырым жолда ақы жинауды жоспарлап отыр. Жиналған ақша елдегі жолдарды күтіп ұстауға жұмсалады.
Б. Камалиев Қазақстандағы автомобиль жолының жалпы ұзындығы 96 мың шақырым екенін атап өтті. Оның 25 мың шақырымы республикалық маңызы бар, 71 мыңы жергілікті маңызы бар жолдар. Республикалық трассалардағы қатынасты барынша қолайлы ету үшін биыл жыл соңына дейін жол бойындағы қызмет көрсету нысандарының 66 %-ы ретке келтіріледі. Ал 2025 жылы республикалық маңызы бар автожолдар халықаралық талапқа сай келетін заманауи әжетхана, дүкен, жанармай құю бекеті және демалыс орнымен қамтамасыз етіледі.
Сонымен қатар вице-министр алдағы төрт жылда 12 мың шақырым жол салу және қайта жөндеу жоспарда бар екенін айтты.
Айта кетейік, 1 қарашадан бастап елімізде жеті автомобиль жолы ақылы болады. Бірнеше ай бұрын жүк көлігін жүргізушілер жаңа ақылы жолдардың ашылуына қарсы шығып, алдымен жол сапасын жақсартып, инфрақұрылымды дамытуды, содан кейін ғана ақша жинауды талап етті.
Комментариев: 0