Бүгін ҚР Энергетика министрі Алмасадам Сәтқалиев елде АИ-92 маркалы бензин жеткілікті екенін айтты. Бірақ 95-бензин тапшы болуы мүмкін.
«АИ-95 бензині бойынша кішкене мәселе бар. Ол қымбаттауы мүмкін. Жазғы маусымда демалыс аймақтарына сапар шегетіндер көбейеді, сол үшін бұл мәселені реттеу қиын. Осыған орай 95-бензин бойынша белгілі бір қауіп бар», — деді министр. Ол үкімет жағдайды бақылауда ұстауға тырысып жатқанын айтты, сол мақсатта мұнай өндіруші ұйымдар және желілік компаниялармен тиісті кездесулер өткізіп, Ресейден АИ-95 бензинін әкелуді сұрады.
Қолда бар ақпаратқа сүйенсек, елде АИ-95 тапшылығы Шымкент мұнай өңдеу зауытындағы күрделі жөндеуден кейін сезіле бастады. Зауытта дизель қондырғысы жөнделгенімен, бензин жабдығынан ақау шықты. Қазір Шымкенттегі зауыт 95-безнин өндіріп жатқан жоқ. Жақында Павлодар мұнай өңдеу зауыты да жөндеуге жабылды. Демек АИ-95 Атырауда ғана шығады. Бұл елдің бүкіл аумағына жетпейтіні анық.
5 шілдеден 17 шілдеге дейін Шымкенттегі зауыт қайта жабылып, дұрыс жұмыс істемей тұрған бензин шығаратын қондырғысын жөндейді. Ол жөнделе ме, белгісіз. Егер шымкенттік инженер-техниктер оны жөндей алмаса, зауыт Қытайдан келетін қосалқы бөлшекті ұзақ уақыт күтуге мәжбүр болады.
Осы келеңсіздіктер салдарынан елде АИ-95 тапшы болуы мүмкін. Ал министр айтқан Ресей бензині (жеткізу жөнінде әлі келісім жасамаған, оның үстіне Ресейден жанармай шығаруға тыйым салынған) акциз, логистика және т.б. жағдайды есепке алғанда, әр литрі 350 теңгеден кем болмайды. Қазір жергілікті АИ-95 бензинін ірі жанармай құю желілері 230–235 теңгеден (кей бекетте литрі 220–225 теңге), шағын бекеттер 250 теңгеден сатып жатыр.
Энергетика министрі 2024 жылы Қазақстанда бензин бағасы қандай болатынын айта алмады.
«Келер жылға дейін күтейік. Нарықтағы жағдай қалай өзгеретінін, Ресейде баға қандай болатынын көрейік. Егер тұтыну көлемі артып, сырттан отын кіргізсек, импорт бағасы орташа бағаға әсер ететіні анық. Яғни, ол жақта баға өссе, бізде де өседі», — деді министр.
Қазір Қазақстанда жанармайдың бөлшек саудадағы шекті бағасын мемлекет реттейді. Бекеттер АИ-92 және АИ-93 маркалы бензиннің литрін өңірге байланысты 182–187 теңгеден 205 теңгеге дейін сатады.
Комментариев: 0