Audi Q3-тің екінші буыны 2018 жылдың маусымында таныстырылған, бірақ біздің елге енді ғана жетті. Себебі 1.4 литрлік алдыңғы жетекті көлікті елге жеткізу 2019 жылы мүмкін болғанмен, ресми дилер 7 сатылы роботпен жұмыс істейтін 180 ат күшіне ие 2.0 литрлік моторы бар толық жетекті кроссовер алуды көздеген.
Audi Q3-тің бағасы 22 млн теңгеден басталады. Бірақ сатушылар қолындағы машиналар одан қымбат. Олар 25.5-28 млн теңге аралығында саудаланып жатыр. Жыл соңына дейін марка 10 көлікті сатпақ, олардың жартысы әлден иесін тауыпты.
Q3 2.0 литрлік қозғалтқышы бар 16.4 млн теңге тұратын BMW X1-мен, Volvo XC40-пен (19.6 млн теңге), 2 литрлік турбомоторы бар Lexus NX 300-бен (21.2 млн теңге) бәсекелеседі.
Қарапайым Q3-тің артынан Қазақстанға Sportback нұсқасы келеді. Оның бағасы шамамен 800 мыңға жоғары болады деген болжам бар. 400 ат күшін беретін 2.5 литрлік агрегаты бар RS Q3-тің де жарыққа шығатын күні алыс емес.
Жаңа Audi Q3 алдыңғысынан 9.6 см-ге, ал дөңгелек базасы 7.6 см-ге ұзын. Салонындағы мультимедиа кешенінің 10 дюймдік экраны мен аспаптар панелінің орнына қолданылатын 12.3 дюймдік дисплей ерекше көз тартады. Опциялар тізімінде автоматты тежеуіш, қозғалыс жолағын қадағалайтын жүйе, бейімді круиз-бақылау және тағы басқа көптеген көмекшілер бар.
Комментариев: 0