Уақытша нөмір үлгілерін бүгін ҚР ішкі істер министрінің орынбасары Марат Қожаев көрсетті. Полицейдің айтуынша, нөмірлер 18-аймаққа тиесілі болады, ал тіркеу деректері жарамдылық мерзімі 2021 жылдың 1 наурызына дейінгі уақытша техникалық құжаттарға жазылады. Аталған нөмірлерді мамандандырылған ХҚКО береді.
Ел аумағына уақытша кіргізілген көліктер ішінен тек техникалық регламентке сай машиналар ғана есепке алынады. М.Қожаев рөлі оң жақта орналасқан автокөліктердің Қазақстанда тіркелмейтінін атап өтті.
27.01.2020 жылы 18:00-де толықтырылды:
Вице-министрдің айтуынша, ЕЭО елдерінен кіргізілген автокөліктерді уақытша тіркеу үшін келесі құжаттар қажет:
- жеке куәлік
- бұрынғы мемлекеттік не транзиттік нөмірлік белгілер
- тіркеу туралы куәлік
- меншік құқығын растайтын құжаттар
- бастапқы тіркеу үшін жасалған төлем түбіртегі
- мемлекеттік нөмірді әзірлеу үшін және техникалық құжат даярлау үшін төленген алым түбіртегі.
«Көлікті уақытша тіркегеннен кейін бір жыл ішінде утилизациялық алым мен кедендік салықтардағы айырмашылықты (Армения не Қырғызстаннан келген машиналар үшін) төлеу қажет болады.
Мысалы, Арменияда өз атына берілген техникалық құжаты бар Қазақстан азаматы кедендік алым-салықтарды төлеуді 2021 жылдың 1 наурызына дейінгі мерзімге ұзарта отырып, көлігін уақытша тіркей алады. Егер ел азаматына осындай мүмкіндік беріліп, ол төлем жасамаса, машинаның құжаттары мен мемлекеттік нөмірлері жарамсыз болып қалады. Одан бөлек, егер Қазақстан азаматы автокөлікті Ресейден сатып алу-сату келісімшарты бойынша сатып алып, оны Қазақстанда сенімхат бойынша басқарып жүрсе, көлікті есептен шығарып, осы науқанға қатыса алады», — деді М. Қожаев.
Естеріңізге сала кетейік, қазіргі уақытта шыққанына үш жылдан асқан көліктерді бастапқы тіркеуге қою үшін төленетін алым сомасы 1 325 500 теңгені құрайды.
Комментариев: 0