Dongfeng киберкроссовер шығарады

Қытайлық Dongfeng киберспортқа қызығатын Z ұрпақ өкілдеріне арнап автомобиль дайындады. Aeolus Haohan кроссоверінің арнайы Space E-Sports Edition түрленімі шығады, жергілікті БАҚ машина сериялы өндіріске түсуі мүмкін екенін болжап отыр.

Түпнұсқа Haohan ерекше бампері, қырлы шанағы және үшбұрыш жарықдиодты өрнектерімен футуристік бейнеге ие. Ал Space E-Sports-тың дизайны жарық шашатын алдыңғы панель, бампер мен капоттағы жапсырмалардың арқасында өзгеше болады.

Сондай-ақ оны арнайы дөңгелек дискісі, айна орнындағы камера және ерекше шанақ бояуынан танисыз. Интерьері ашық сары және сұр түсті болады. Суреттен дизайнерлер трек спорткарларынан шабыт алғаны байқалады.

Өндіруші Haohan «киберспорт» көлігінің техникалық сипаттамасын жариялаған жоқ. Модельдің стандарт нұсқасы Қытайда 1.5 литрлік дәстүрлі моторы бар гибрид күштік құрылыммен (204–360 ат күшіне ие) жүреді.

Қытайда сериялы модельдің кибернұсқасы алғаш рет шығып отырған жоқ. Мысалы, Tank 300-дің Cybertank және Cyberknight деп аталатын екі түрленімі болды, олар да Aeolus Space E-Sports сияқты стандарт модельден экспрессивті дизайнымен ғана ерекшеленді.