Дөңгелекке оқ атып, есікке жармасты. Полиция мас жүргізушілерді қалай ұстады

Алғашқы оқиға Астанада болған. Полицейлер Мәскеу мен Потанин көшелерінің қиылысында жол бойында тұрған Kia-ны байқапты. Жүргізушіден көліктен түсуді сұрағанда ол тоқтамай, жүріп кеткен. Астана ПД баспасөз қызметі хабарлағандай, қиылыста қызыл шырақ жанып, ереже бұзған азамат аялдауға мәжбүр болады. Осы кезде полицей көлікке жүгіріп барып, есікті ашуға тырысқан, алайда жүргізуші жүрісін жалғастырып, инспекторды 20–30 метрдей сүйреп кеткен.

Тәртіп сақшылары көлікті жолын бөгеп тоқтатты. Рөлде отырған 23 жастағы жігіттің жүргізуші куәлігі жоқ, оның үстіне удай мас екені анықталды. Полицияға бағынбағаны үшін және көлікті тиісті куәліксіз әрі мас күйде жүргізгені үшін ол 20 тәулікке қамалды. Машина айыптұраққа кетті.

Мас болып рөлге отырған тағы бір тұрғын Семей қаласы маңындағы Ново-Баженово ауылында ұсталды. Mitsubishi Pajero жүргізушісі полиция көлігін байқаған бетте жылдамдығын үдеткен, бұл инспекторлардың күдігін туғызды. Жүргізуші «тоқта» деген талапты елемей, қашуға тырысқан.

Ол жолсыз жермен қашпақ болғанда полиция алдымен әуеге ескерту оғын, кейін машина дөңгелегін атты. Кем дегенде алты оқ атылды. Көліктің артқы дөңгелегі жарылып, қарға кептеліп қалған. Рөлде есірткі шегіп, алкоголь ішкен 38 жастағы ер адам отырғаны белгілі болды. Сот шешімімен ол 15 тәулікке қамалды, сондай-ақ 7 жыл машина жүргізе алмайды.