Жалпыұлттық социал демократиялық партия фракциясының депутаты Наурыз Сайлаубай үкімет басшысының орынбасары Роман Склярға сауал жолдап, 2022 жылғы 1 қыркүйектен кейін келген автомобильдерді заңдастыруды ұсынды. Оның айтуынша елде мұндай 80 мыңға жуық машина жүр.
«Қарапайым халық неге басқа елден автомобиль әкеледі? Өйткені олар жаңа, сапасы жақсы, бағасы тиімді. Ескі машина қымбаттап кетті, өзімізде құрастырылған жаңа автомобиль қымбат әрі сапасы бағасына сай келмейді. Шетел көлігін ресми сатып алайын десе, утиль алымы мен бастапқы тіркеу сомасы жоғары. Сол үшін тұрғындар көрші елдерден көлік тасиды», — дейді мәжілісмен.
Наурыз Сайлаубай ЖСДП атынан шетелдік машиналарды заңдастыру мерзімін билік мұндай техниканы елге заңсыз кіргізбейтін нақты шара тапқанға дейін ұзартуды ұсынды.
«Мұндай машинаны жалғызбасты аналар, көп балалы отбасылар, мүмкіндігі шектеулі бала тәрбиелеп отырған отбасылар, 35 жасқа дейінгі жастар да мініп жүр», — деді депутат.
Қазақстанға 2022 жылғы 1 қыркүйекке дейін келген шетелдік автокөлікті заңдастыру шарасы 23 қаңтарда басталған, ол биыл 1 шілдеге дейін жалғасады.
Көлігін заңдастыруға рұқсат алған жүргізуші мына соманы төлеуі керек:
- бастапқы тіркеу алымы — 200 000 теңге;
- техпаспорт үшін мемлекеттік баж салығы — 4313 теңге;
- мемлекеттік нөмір үшін баж салығы — 9660 теңге.
ЕЭО-ға мүше емес мемлекеттен және Армения мен Қырғызстаннан келген автомобиль үшін кедендік баж немесе кедендік салық айырмасын төлеу керек.
Жақында полицейлер «конструктор» көліктерді заңдастырады.
Комментариев: 0