Denza Z9 GT Еуропа көліктерінен артық па?

Концерннің вице-президенті Стелла Ли Милан дизайн апталығындағы тұсаукесерде BYD биыл Denza автомобильдерін Еуропада саудалайды деп мәлімдеді. Марканың алғашқы өнімі бес есікті Z9 GT болады. Denza Mercedes-Benz, BMW сияқты Еуропаның премиум маркаларына бәсекелес болмақ. Стелла Ли Denza олардан он есе артық деді.

Концерн өкілі Denza дизайны, сипаттамасы және технологиясы жағынан бәсекелестерінен мықты екеніне сенімді. «Бізде басқа дәстүрлі брендтерде жоқ ерекше мүмкіндіктер бар. Барлық бәсекелес машинаны сынақ алаңына әкеліп, клиенттерге таңдау жасауға мүмкіндік берейік, сонда BYD автомобилін сату оңай екенін байқайсыз», — деді Стелла Ли.

Denza Z9 GT Еуропада қанша тұратыны белгісіз. Қытайда шутинг-брейкті 339 800–419 800 юаньға (24–29.5 млн теңге) алуға болады. Модельдің электрлі және гибрид түрленімі бар. Екеуі де үш электромотормен жүреді, бірақ гибридте қосымша бензинді қозғалтқыш болады. Күштік құрылым қуаты — сәйкесінше 965 және 870 ат күші.

Z9 GT-ден кейін Denza Еуропа нарығына D9 минивэнін шығарады. Марканың ЕО мен Ұлыбританияға арналған топтамасы төрт немесе алты модельден тұрады. Denza BYD-ден бөлек дилерлік желі құруды жоспарлап отыр.