Дания жол талғамайтын Porsche 911 жасайды

Данияның Kalmar Automotive ательесі 996 шанағындағы Porsche 911-ді спорттық жол талғамайтын көлікке айналдыру жобасын ұсынды. Машинаның моторы, шассиі, шанағы және интерьері өзгереді, спорткарды әрлеу бағасы 45 мың еуродан басталады. Ал зауыттық 911 Dakar Германияда кем дегенде 220 мың тұрады.

Арнайы серіппе мен амортизаторы бар аспаның арқасында спорткар клиренсі 210 мм-ге жетеді. Қосымша бейімді амортизатор тағы 50 мм қосады. Porsche 911 төменгі бөлігін қорғау және жолсызға арналған шинамен жабдықтамақ. Қосымша ақы төлеп, шанақты мығым ететін қауіпсіздік қаңқасын орнатуға болады.

1 / 9

• 
• 
• 
• 
• 
• 
• 
• 
• 

1 / 9

Негізгі нұсқасы 300 ат күшіне ие 3.4 литрлік қозғалтқышын сақтап қалады. Бірақ клиент өтініші бойынша Kalmar Automotive машина қуатын тағы 200 күшке арттыра алады. Тұтынушы механика немесе автомат қораптың бірін таңдаса болады.

Тюнерлер салоннан медиажүйе, дыбыс изоляциясы сияқты заманауи құрылғыларды алып тастайды. Олар мұндай заттар көлік жүргізуден ләззат алуға кедергі келтіреді деп санайды. Оның орнына Recaro креслосы немесе жарыс орындығын орнатады. Kalmar RS-6 шанағында экспедицияға арналған жүксалғыш, қосалқы дөңгелек орны және жарықдиодты тақта болады. Компания купені кез келген түске бояуға дайын.

Түпнұсқа Porsche 911 996 Еуропада шамамен 20–30 мың еуро тұрады, оны әрлеуге 45–50 мың қажет. Демек Kalmar Automotive ұсынған жол талғамайтын 911-дің бағасы зауыттық нұсқаның жартысындай ғана болады. Бірақ көлікті біршама уақыт күтуге тура келеді, тюнерлер әр машинаны әрлеуге жарты жыл жұмсайды.