Бизнес тиімділігін арттыру мақсатында Daimler AG Еуропадағы автосалондары мен техникалық қызмет көрсету орындарын едәуір қысқартады. Ұлыбритания, Испания және Бельгияда орналасқан 25 Mercedes-Benz орталығы сатылады, онда 2800 қызметкер жұмыс істейді.
Reuters агенттігі хабарлағандай, автоөндіруші көрме залдары (Showroom) мен сервистік орталықтарды сатудан шамамен бір миллиард еуро табыс табады. Иесі ауысқанымен орталықтардың көбі бұрынғыдай «мерседес» сатумен және қызмет көрсетумен айналысады. Бірақ бұдан былай Daimler-ге тиесілі болмайды.
Қазір автоконцерндер машинаны онлайн сатуға баса назар аударып отыр. Бұл қарапайым дилерлік орталықтардың тиімділігіне күмән тудыра бастады. Көлікті зауыттан клиенттерге тікелей жеткізіп беру делдалдарды қосымша опция мен қызмет ұсыну арқылы табыс табу мүмкіндігінен айырды. Мұндай сату схемасын бірнеше жыл бұрын Tesla жолға қойған. Қазір Hyundai сынды көптеген автоөндірушілер осы бағытқа бет бұрды.
Комментариев: 0