Cybertruck пен Porsche 911 жарысты: кім жеңді

Былтыр желтоқсанда өткен Tesla Cybertruck-тың тұсаукесері кезінде Илон Маск электрлі пикаптың үш моторлы нұсқасы 402 метрге жарыста Porsche 911 тиелген тіркемені сүйреп, Porsche 911-ден озып кететінін айтқан.

Кәсіпкер өз сөзін дәлелдеу үшін электромобиль шынымен мәреге жылдам жеткен видеоны жариялады. Бірақ эксперименттің әділ өткеніне күмән туып, Porsche жүргізушісі газды толық басты ма деген сұрақ пайда болды.

Пикап тұсаукесерінен алты ай өткен соң MotorTrend мамандары Engineering Explained YouTube-арнасының авторымен бірге бұл сұраққа нүкте қоюды шешті.

Эксперимент қалай өтті

Журналистер сынаққа екі Porsche 911 Carrera T спорткарын алды. Оның бірі механикамен, екіншісі PDK роботымен жұмыс істейді. Сондай-ақ әу бастағы видеодағы сияқты үш моторлы Cybertruck пен тіркеме таңдап алды. Тіркемедегі 911-ді жеңілдету үшін жанармайын төгіп, салон мен жүксалғыштағы заттарды, тіпті кілемшелерді алып тастады. Нәтижесінде тіркемедегі екі педальді машина үш педальді Porsche-ден 16 келі жеңіл болды.

1 / 7

• 
• 
• 
• 
• 
• 
• 

1 / 7

Пикапқа салмағы ауырлау жүргізуші отырды, тіркеменің ең жеңілін таңдады. Ол 911 салмағына (шамамен 1.5 тонна) тең жүк тасуға арналмаған. Артық салмақ 320 келі болды. Дегенмен Tesla ролигінде дәл осындай тіркеме қолданылған, оның үстіне MotorTrend жігіттері өндірушіден қауіп бар-жоғын сұрады. Ал компания еш проблема болмайды деген.

1 / 2

• 
• 

1 / 2

Мұқият қарасаңыз PDK қорабы бар 911 тіркемеге тиелгенін, ал жарысқан көлік механикамен жүретінін байқайсыз. Мұны Cybertruck-қа берілген тағы бір артықшылық деп бағалауға болады.

Кім жеңді

Нәтижесінде 402 метр қашықтыққа жарыста 911 жеңіске жетті. Бұған таңғалудың қажеті жоқ. Неміс спорткары 402 метрді 12.2–12.5 секундта жүріп өтті, ал Tesla 12.7–12.9 секунд нәтиже көрсетті.

Cybertruck ⅛ мильге Porsche-ден бұрын жете ме деген сұрақ көпті қызықтырған. Бұл сында электромобильдің сәл мүмкіндігі болды. Бірінші жарыста пикап 0.1 секунд жылдам жетті, бірақ Porsche жүргізушісі екінші мүмкіндікте нәтижесін 8.2-ден 7.9 секундқа қысқартты, ал Cybertruck 8.1 секундтан жылдам нәтиже көрсете алмады.

Осылайша негізгі сұраққа жауап табылды. Porsche 911-ді сүйреген Tesla Cybertuck ең баяу 911-ге жете алмайды. Егер спорткар жүргізушісі тәжірибелі драг-рейсер болмаса ғана пикапқа мүмкіндік тууы мүмкін.