Citroen арзан электромобиль шығарды

Citroen үнді нарығына шығатын алғашқы электрокарын таныстырды. Бес есікті eC3 осы елде саудаланып жатқан бензинді C3-тің батареялы нұсқасы саналады және одан басқа айырмашылығы жоқ. Электромобиль арзан болады деген болжам бар. Жергілікті басылымдар ол шамамен 899 мың рупия (5 млн теңге) тұратын шығар деп топшылады.

1 / 4

• 
• 
• 
• 

1 / 4

Француздар Үндістан тұрғындарына сататын Citroen C3-тің аттас еуропалық модельге еш қатысы жоқ. Ол ұзындығы төрт метрден аспайтын, жарқын түске боялған бес есікті арзан хетч. Моторы ауысқанмен, пошымында үлкен өзгеріс жоқ. Тек айнасы мен тұманға қарсы шамдарында ақ түсті элемент басым, сонымен қатар беріліс қорабының иінтірегін алып тастап, орнына шағын селектор қойыпты.

Машина 57 ат күші мен 143 Нм момент беретін электромотормен жүреді. Қозғалтқыш 6.8 секундта 60 км жылдамдық алуға мүмкіндік береді. Ал максимал жылдамдығы сағатына 107 шақырымнан аспайды.

Шағын аккумулятор (29.2 кВт⋅сағ) 320 км жол жүруге жағдай жасайды. Өндіруші ақша үнемдеу үшін батареяға термореттеу жүйесін орнатпаған, сондықтан 10-нан 80 %-ға дейін қуаттау үшін 57 минут кетеді. Ал тұрмыстық резеткі көмегімен 10 сағат қуатталады.

Citroen борт құрылғыларын жасағанда ақша аямаған сияқты, eC3-ке 10.2 дюймдік экраны мен 4 динамигі бар медиажүйе, ауа баптағыш және кілтсіз ашу жүйесін орнатуға болады. Жабдықтар тізімінде екі қауіпсіздік жастығы мен ABS бар.

Марка 22 қаңтарда модельге тапсырыс қабылдай бастайды, тікелей сату ақпанда басталады.

Үндістан халқы С3-ті таласа алып жатпаса да, Citroen-ның бұл нарықтан орын табуға күш салуын түсінуге болады. 2022 жылы Үндістан алғаш рет автомобиль нарығы көлемі бойынша Жапонияны артқа тастап, үздік үштікке енді. Алғашқы екі орында бұрынғыдай Қытай мен АҚШ тұр.