Chevrolet біраз уақыт бұрын Silverado үлгісінің жаңа буынын көпшілік назарына ұсынған болатын. Оның артынан Suburban мен қысқа Tahoe-ны дайындап жатыр. Көліктер 2020 жылдың басында көрсетіледі деп күтілген еді, бірақ компания тосын сый жасауды ұйғарыпты.
Екі машинаның да сырт келбеті біраз пікірталас тудырған Silverado стилінде жасалған. Жол талғамайтын көліктердің көлемі бұрынғыдай. Suburban-ның дөңгелек базасы 104 мм-ге, ал жалпы ұзындығы 33 мм-ге артса, Tahoe дөңгелектерінің арасы 125 мм-ге, ал алдыңғы бамперінен артқы бамперіне дейінгі қашықтық 170 мм-ге артты.
Техникалық жағынан бұларды алдыңғы буын өкілдерінен жаңа артқы аспа ерекшелейді. Компания қиылмайтын белдіктің орнына тәуелсіз көп иінтіректі аспаны қолдану дұрыс деп тапқан. Енді сатып алушылар үшін опция ретінде фирмалық көп иінтіректі Magnetic Ride Control, сонымен қатар Air Ride пневматикалық бейімді аспасы қолжетімді болады.
Жол талғамайтын көліктердің қақпақ астына бұрынғы 355 және 420 ат күшін беретін 5.3 және 6.2 литрлік V8 орнатылады, бірақ бұдан былай олардың қатарына 277 арғымақтың күшіне тең 3 литрлік Duramax турбодизелі қосылады. Қозғалтқыштар 10 сатылы автоматты беріліс қорабымен жұптаса жұмыс істейді.
Салондағы мультимедиалық кешен қызметін атқаратын 12.6 дюймдік дисплей мен кешеннің 10 дюймдік экраны бірден көз тартады. Темір тұлпар ішіне бес дисплейге дейін орнатуға болады. Электронды көмекшілер тізімінде автоматты тежеу жүйесі, бірнеше қосымша камера, алда және артта жақындап келе жатқан жаяу жүргіншілер туралы ескерту функциясы және тағы басқа көптеген көмекшілер бар.
Жаңа көліктердің қанша тұратыны белгісіз, бірақ сатушылардың қолына 2020 жылдың орта тұсында түседі.
Комментариев: 0