Chevrolet Lacetti өндірісі 2024 жылы тоқтайды

Lacetti Қазақстан нарығына енді оралғанда Асакадағы UzAuto зауытында модель конвейерден алынатыны туралы хабар келді. Бұл ақпаратты жергілікті «Автострада» басылымы хабарлады.

Соңғы Lacetti 2024 жылдың басында конвейерден кетеді. Оның орнына компания Onix седаны мен жаңарған Cobalt-ты көптеп өндіреді, сонымен қатар жаңа бюджеттік модельдің өндірісін іске қоспақшы, бірақ ол туралы әлі ақпарат жоқ.

Қазақстанда сатылып жатқан Lacetti-ді Қостанайдағы зауыт Өзбекстаннан жеткізген машина жинақтарынан құрастырады. Яғни, уақыт өте көлік біздің нарықтан да ғайып болады, бірақ қашан екені белгісіз. Қостанайда дайын Lacetti, сондай-ақ машина жинақтарының қоры бар екені сөзсіз.

Gentra деген атпен белгілі Lacetti 2002 жылы пайда болды. Зауыттық индексі — J200. Cедан Кореяда жасалып, 2009 жылға дейін Daewoo брендімен сол жерде шықты. Өз нарығынан бөлек, машина Қытай, Үндістан, Ресей, Колумбия және Өзбекстанда жасалды. Сондай-ақ 2007-2011 жылдары Өскемендегі «Азия Авто» конвейерінде седан мен хэтчбек түпнұсқа дизайнда құрастырылды.

Кореядағы негізгі конвейерде J200 шанағындағы «Лачетти» өндірісі 2012 жылы тоқтаған. Бүгінгі күнге дейін толық циклде Lacetti шығаратын жалғыз зауыт — Әндіжан облысындағы UzAuto. Модель жылдар бойы тиімді және тапшы болды. Биылғы он ай қорытындысы бойынша 65 676 данасы шығып, бренд ең көп өндірген үшінші модель атанды. Бірінші орында Cobalt (89 410 дана), екінші қатарда коммерциялық Damas (69 323 дана) тұр.