2021 жылы мамырдың соңында Қазақстанда Chevrolet Equinox кроссоверінің үшінші буыны сатылымға шықты. Қостанайдағы зауытта SKD әдісімен құрастырылған машина тек бір жиынтықта сатылды (бағасы —13.5 млн теңге).
Енді біздің нарыққа арналған Equinox жаңарды. Рестайлингтен өткен кроссоверді сырттай алдыңғы жіңішке шамы және жаңа алдыңғы бамперінен тануға болады. Салонында айтарылқтай өзгеріс жоқ.
Көлік бұрынғыдай 2 литрлік турбомотормен жүреді. Бірақ қозғалтқыш қуаты алдыңғыға қарағанда сәл кеміді. Ат күші 252-ден 236-ға, айналу моменті 355-тен 350 Нм-ге төмендеген. Соған қарамастан Equinox-тың моторы Қазақстан нарығында өз қатарластарының ішіндегі ең қуаттысы саналады. Агрегат 9 сатылы автоматпен жұмыс істейді. Машина толық жетекті.
Equinox бұрынғыдай бір нұсқада (RS) ұсынылады, бағасы — 15.5 млн теңге. Көлік бірден 2 миллионға қымбаттап отыр. Машинаның сыртқы пішіні жаңарды, әрі электронды көмекшілер тізімі көбейді. Атап айтқанда, автоматты тежеу, жаяу жүргіншілерді анықтау, жолақта ұстау және көрінбейтін аймақтарды бақылау функциясы бар.
Машина алты қауіпсіздік жастығы, екі аймақты климат-бақылау, экраны 8 дюймдік және Apple CarPlay, Android Auto-мен жұмыс істейтін мультимедиа кешені, панорамалы шатыр, Start/stop жүйесі, бейімді круиз-бақылау, кілтсіз ашу және тағы басқа пайдалы опциялармен жабдықталған.
Комментариев: 0