Chevrolet Captiva-ның екінші буыны Қостанайда жасалады

Жергілікті реестрде екінші буындағы Chevrolet Captiva-ға тиесілі көлік құралының типін мақұлдау құжаты жарияланды. 2019 жылы жарық көрген модель — өңі өзгерген Baojun 530.

Құжат бойынша автомобильдің ұзындығы — 4711 мм, ені — 1835 мм, биіктігі — 1750 мм, ал дөңгелек базасы — 2750 мм. Қостанайдағы зауыт көлікті қалай құрастыратыны жазылмапты, бірақ бастапқыда ірі торапты әдіс қолданатын сияқты.

Captiva 147 ат күші мен 250 Нм момент беретін 1.5 литрлік турбомотормен жүреді. Қорап типі белгісіз, дегенмен Өзбекстанда алдыңғы жетекті кроссовер тек вариатормен сатылып жатыр.

Бренд Қазақстан нарығына шығатын модельдің бағасы мен жиынтық түрлерін хабарлаған жоқ. Бірақ көрші елде үш комплектацияда саудаға түседі.

Базалық Captiva-ның жабдықтар тізімінде алты қауіпсіздік жастығы, жүргізуші ассистенттерінің жинағы, артқы парктрониктер, круиз-бақылау, артқы көрініс камерасы, сымсыз ашу жүйесі, экраны 10.4 дюймдік медиажүйе және аспаптар панелінде 7 дюймдік дисплей бар. Салоны жасанды былғарымен қапталған. Ең арзан Captiva бес орынды болады, ал LT2 нұсқасына 7 орындық қойып, жарық сезгегін орнатады.

Үздік Premier климат-бақылау, панорамалық люк, жарықдиодты оптика, айнала шолу камералары және алдыңғы парктрониктермен толыққан, аудожүйесі алты динамикті, салоны перфорациялы жасанды былғарымен қапталған.

Машинаның Өзбекстандағы бағасы 300-350 млн сум (11.7-13.7 млн теңге) аралығында. Біздің елде Captiva-ның екінші буынын тек қолдан аласыз. Біріккен Араб Әмірлігінен келген көліктер 10.5-14.5 млн теңге тұрады.