Chevrolet 2023 жылы топтамасынан алып тастаған Camaro қатарға қайта қосылуы мүмкін. Бұл туралы инсайдерлер Autonews-ке хабарлаған. Автомобиль 2027 жылдың аяғында жарық көреді деген болжам бар.
Жаңа өнім маслкардың алдыңғы буыны және Cadillac-тың жеңіл көліктеріне арналған Alpha платформасына негізделеді. Демек жаңа Camaro электромобиль емес, ол V8 моторын сақтап қалуы ықтимал. Модель жақында Corvette Grand Sport-та дебют жасаған 542 ат күшіне ие 6.7 литрлік агрегатпен жабдықталады деген сыбыс тарады.
Бірақ маслкар жанкүйерлеріне ұнамайтын бір жаңалық бар. Carscoops басылымы GM Authority-ге сілтеме жасап хабарлағандай, жаңарған Camaro нарыққа екі есікті емес, төрт есікті нұсқада шығады, яғни ол седан немесе төрт есікті купе болады. Бұған дейін Dodge Charger осылай өзгерген. Ford басшылары осындай жолмен Mustang топтамасын кеңейтуді жоспарлап отырғанын бірнеше мәрте айтты.
Жаңа Camaro туралы қазірше ешқандай ресми ақпарат жоқ. Бірақ 2025 жылы Chevrolet модельдің болашағы жайлы жанама мәлімет бергендей болған. Былтыр күзде GM Design студиясы Tomorrow’s Vision Today көрмесінен фото жариялады, ондағы эскиздердің бірін Camaro-ның жаңа буыны деп қабылдауға болатын сияқты.
Комментариев: 0