General Motors жақында Chevrolet Blazer EV электрокроссоверінің алғашқы суретін көрсеткен, енді оның техникалық жағы туралы ақпарат берді.
Blazer GMC Hummer EV және Cadillac Lyriq моделі секілді Ultium платформасына негізделген. Бұл платформаның ерекшелігі — жетек түрінің кез келгенін таңдауға болады, «Шеви» соның бәрін қолдануға шешім қабылдады. Демек Blazer EV топтамасында алдыңғы, артқы және толық жетекті түрленім болады. Таңдалған батарея мен мотор санына байланысты жүріс қоры 398-ден 515 шақырымға дейін жетеді.
Модельдің салоны бес орынды. Жүргізуші алдындағы қос планшет бірден назар аудартады. Аспаптар панелі 11 дюймді, ал 17.7 дюймдік дисплей мультимедиа мен әртүрлі борттық жүйенің жұмысына жауап береді. Опциялар тізімінде жылытуға, желдетуге болатын орындықтар және көмекші жүйелер кешені бар.
GM модельдің атауына SS әрпі қосылған қуатты нұсқасын шығаруды ұмытқан жоқ. Мұндай кроссовер 565 ат күші мен 879 Нм момент беретін екі электромотормен жүреді. Машина агрессивті бастырық, 22 дюймдік дөңгелек дискісі, Brembo тежеуіші және спорттық аспасымен ерекшеленеді.
Электрлі Blazer Мексикадағы зауытта шығады. АҚШ-та қазірден бастап тапсырыс беруге болады (депозит 100 доллар). Бірақ клиенттер көлікті жақында алмайды. Модельдің кей нұсқасы келер жылы жазда, ал ең үздік SS түрленімі 2024 жылы сатыла бастайды. Қарапайым Blazer EV-дің бағасы 47.6 мың доллардан басталады.
Комментариев: 0