Chery жеті eQ7 электрокроссоверінен мұнара жасады

Chery ерекше маркетинг әдісін ойлап тапты: марка жеті eQ7 кроссоверінен мұнара жасады. Осы арқылы олар машинаның алюминий шанағы берік әрі қатты екенін дәлелдемек болған.

Ең төменде тұрған кроссовер үстіндегі алты «туысы» мен олардың арасына қойылған платформа салмағына шыдады. Мамандар платформаны автомобильдер құлап кетпеу үшін орнатқан.

Краш-тест өткізетін АҚШ жол қауіпсіздігін сақтандыру институтының (IIHS) талабына сай автомобиль шанағы өзінен төрт есе ауыр салмаққа шыдауы қажет. Chery осы стандарттан бір жарым есе асып түсті. Қытай концерні eQ7-ні Америка нарығына шығара ма, жоқ па, белгісіз.

Бұл жаңа идея емес. Қазір Geely-дің бір бөлігі саналатын Volvo мұндай тәсілді 1980 жылдардан бері қолданып келеді. Бұрын швед компаниясы седандардан мұнара құрастырған, ал 2021 жылы XC60 кроссоверін осылай сынады. Volvo 2020 жылы төрт жүк көлігін бір-бірінің үстіне жинаған, олардың жалпы салмағы 58 тонна болды. Машинаның мықтылығын көрсету үшін сол кездегі Volvo Trucks президенті Рогер Альм «мұнара» үстіне шықты.