Басты бет → Жаңалықтар → Chery Tiggo 7 және Tiggo 8 гибридтері Қазақстанда қанша тұрады
Chery Tiggo 7 және Tiggo 8 гибридтері Қазақстанда қанша тұрады

Chery Tiggo 7 және Tiggo 8 гибридтері Қазақстанда қанша тұрады

Компания екі кроссовердің бір комплектациясын ұсынады.

15 сағат бұрын | | 53
Авторы: Виктор Сухоруков

Chery-дің Қазақстандағы модельдер қатарына Tiggo 7 кроссоверінің гибрид нұсқасы және бензоэлектрлі Tiggo 8 қосылды. Екі көлік Алматыдағы AMMKZ зауытында жасалады.

Екі өнім қосылатын параллель гибрид күштік құрылыммен жүреді. Іштен жанатын 1.5 литрлік қозғалтқыш 143 ат күші және 215 Нм момент береді. Ол бір сатылы редукторы бар 1DHT гибрид блогымен жұптаса жұмыс істейді. Оның құрамына электромотор кіреді. Tiggo 7-де агрегаттың қуаты 204 ат күшіне, Tiggo 8-де 143 ат күшіне тең. Екі кроссовер 18.3 кВт·сағ LFP аккумуляторымен жабдықталған.

Tiggo 7 CSH электр қуатымен NEDC циклі бойынша 93 шақырым еңсере алады. Үш қатарлы Tiggo 8 CSH-тің жүріс қоры 95 км-ге жетеді. Қуаттаусыз және жанармай құймай 1200 шақырым жүріп өтеді. 6.6 кВт айнымалы токпен аккумуляторды 30-дан 80 %-ға дейін толтыруға 3 сағат кетеді. Жылдам станцияда гибридтер 40 кВт ток қабылдай алады. Мұндай жағдайда гибрид 20 минутқа жылдам қуатталады.

Бренд Tiggo 7 CSH пен Tiggo 8 CSH-тің жалғыз Tech комплектациясын ұсынады. Бағалары — 12 және 13.5 млн теңге.

Ұзындығы 4.5 метр болатын Tiggo 7 алдыңғы және бүйірлік эйрбег, жүргізушінің тізе тұсындағы қауіпсіздік жастығы, қауіпсіздік пердесі, айнала шолу камерасы, жүргізуші ассистенттерінің заманауи кешені, панорамалы шатыр, екі аймақты климат-бақылау, барлық орындықты жылытқыш, алдыңғы орындықтарды желдеткіш, рөл, алдыңғы әйнек және әйнек жуғыш бүріккішін жылытқыш, электр көмегімен реттелетін алдыңғы орындықтар, электржетекті жүксалғыш қақпағы, 12.3 дюймдік мультимедиа экраны, дәл сондай өлшемдегі цифрлық аспаптар панелі және 8 динамикті аудиожүйемен жабдықталған. Салоны экобылғарымен қапталған.

4.7 метрлік Tiggo 8 CSH-тің комплектациясы ұқсас болғанмен, үшінші қатардағы орындықтар, екінші қатардағы бүйірлік эйрбег, жүргізуші ассистенттерінің кең жинағы, проекциялық дисплей, массаж функциясы мен аяқ тіреуіші бар алдыңғы жолаушы орындығы, 10.25 дюймдік цифрлық аспаптар панелі, 15.6 дюймдік мультимедиа экраны, 12 динамикті аудиожүйе және сымсыз қуаттағышпен ерекшеленеді. Орындықтары жасанды нубукпен қапталған.

Комментариев: 0

✖
Чтобы оставить комментарий, вам необходимо зарегистрироваться или авторизоваться.