Chery-дің жаңа суббренді шығады

Chery концерні Қытайда Sterra суббрендін таныстырды. Star және Era тіркесінен тұратын атаумен премиум электромобильдер шығады. Марка Sterra ET кроссовері мен Sterra ES седанын көрсетті.

Chery премиум электроседан шығаратыны бұған дейін белгілі болған. Наурыздың басында Қытай басылымдары төрт есікті машинаның патенттік суретін жариялады. Жол сынағы кезінде автомобиль Exeed E03 атауымен көзге түскен. Chery енді жаңа атаумен қоса Sterra ES-тің кейбір сипаттамасын ұсынды.

Седанның ұзындығы — 4.95 метр, дөңгелек базасы — 2.9 метр. Sterra ES 800 вольтты Exeed платформасына негізделеді, ол аккумуляторды он минутта 200 км жол жүруге жетерліктей қуаттауға мүмкіндік береді. Жаңа CATL батареясының арқасында жүріс қоры 700 шақырымға жетеді.

Sterra ES күштік құрылымының қуаты қазірше белгісіз, бірақ көлік алғашқы жүздікті үш секундта еңсереді деген ақпарат бар. Сондай-ақ Sterra ES пневматикалық элементі бар аспа және толық басқарылатын шассимен жабдықталады.

Топтамада бұдан бөлек ET кроссовері болады. Ол туралы қазірше ақпарат жоқ, бірақ мамандар кроссовер сипаттамасы седанмен шамалас екенін айтады. Екі модель де бір платформада жасалады.

Марка екі жаңа өнімді Шанхай автосалонында таныстырады. Седан биыл, ал кроссовер 2024 жылы сатылымға шығады.