Chery-дің жаңа кроссовері — Tiggo 5 Pro

Chery концерні Қытайда Tiggo 5 Pro деп аталатын жаңа кроссоверіне сертификат алып жатыр. Бұл — 5x индексімен әртүрлі нұсқада шығып жатқан Tiggo 5 топтамасының жаңа даму кезеңі. Компания гибрид күштік құрылымы бар автомобильді көктемде көрсеткен. Ол Omoda маркасының модельдер қатарына кіретін прототип еді.

Сертификат суреттерінен Chery Tiggo 5 Pro-ның шанағы Tiggo 5x және Omoda C5-пен бірдей екенін көруге болады. Дегенмен алдыңғы бөлігіндегі екі қатарлы жарық техникасы мен бампері өзгереді, бірақ астыңғы ауа өткізгіш тәрізді жабық панель сол күйінде қалады. Артқы бампері басқаша, ал шамы диодты моноблоктан тұрады.

Chery Tiggo 5 Pro-ның дөңгелек базасы бұрынғыдай (2630 мм), бірақ ұзындығы мен ені ұлғайды. Өлшемдері — 4540×1835×1588 мм, яғни дизайны өзгергендіктен шанағы 140 мм ұзарды.

Жаңа модель әзірге тек бір күштік құрылым алды. 1.5 литрлік бензинді мотор 156 ат күшін береді. Бренд бұл агрегатты Tiggo 5x-ке де орнатады, бірақ Қытайдағы көліктің қуаты 120 ат күшіне тең. Tiggo 5 Pro робот қораппен жабдықталады. Машинаның ең жоғары жылдамдығы — 180 км/сағ, 100 шақырымға 7.92 литр жанармай жұмсайды.

Алдын ала мәлімет бойынша Chery мұндай кроссоверді 2026 жылы Omoda C5-тің жаңа буыны ретінде экспорттай бастайды. Алдымен бензинді түрленім шығады, кейін C5 340 ат күшіне ие гибрид құрылым алуы мүмкін.