Бұл Camry 80-нің күндізгі жүріс шамы ма?

Toyota-ның АҚШ-тағы бөлімшесі жұмбақ тизер жариялап, «жаңа өнім жақында шығады» деп жазды. Суреттегі автомобильдің кей бөлшегі Toyota Camry-ге ұқсайды, бірақ өзгеріс бар. Америкалық БАҚ компания седанның келесі түрленімін немесе жаңа буынын дайындап жатыр деп топшылады.

Бұл шынымен рестайлинг пе? Бұлыңғыр сұлбадан қазіргі Camry 70-тің төбе сызығын, бүйірлік айна контурын және өзге де бірнеше бөлшегін тануға болады. Сондай-ақ Prius стиліндегі жүріс шамы мен жаңа алдыңғы бампер көзге түседі.

Toyota Gazoo Racing бөлімшесімен бірге седанның қуатты нұсқасын дайындап жатыр деген болжам бар. Бұл рас болса, машина Лас-Вегаста өтетін SEMA тюнинг-шоуында жарық көреді.

Екінші болжам бойынша модельдің жаңа, тоғызыншы буыны шығады. Бұның шын болу мүмкіндігі жоғары. Қазіргі Camry XV70 2017 жылы шыққан, жеті жыл модельдің бір буыны үшін аз уақыт емес. Бұл нұсқа рас болса, жаңа өнімнің тұсаукесері Лос-Анджелес халықаралық автосалонында өтеді.

Екі іс-шара да қарашаға жоспарланған. Тұсаукесері қарашада өтсе, жаңа өнім 2025 жылғы модельдік топ өкілі ретінде келер жазда саудаға түседі. Седан АҚШ нарығында аса танымал болғандықтан, тұсаукесер сол елде өткелі отыр, бірақ марка Camry XV70-ті ең алғаш өз елі Жапонияда көрсеткен.

1 / 5

• 
• 
• 
• 
• 

1 / 5

Түрленген Camry прототипі Америка жолдарында көзге түсті. Седан 3.5 литрлік V6-дан арылады, оның орнын дәстүрлі және электрлі 4 цилиндрлі мотор басады.

Бұған дейін тәуелсіз дизайнер жаңа буынның рендерін ұсынған.