BYD-дің Leopard 8 моделі саудаға шықпай жатып арзандады

BYD Қытайда жаңа рамалы жол талғамайтын көлікті сата бастады. FangChengBao Bao 8-ге (Leopard 8) бір ай бұрын алдын ала тапсырыс қабылдай бастаған, енді нақты бағасын жариялады. Әу баста ол 400–500 мың юаньға (27.4–34.2 млн теңге) бағаланған, қазір 379 800–407 800 юаньға (26–28 млн теңге) алуға мүмкіндік бар.

Leopard 8-дің техникалық сипаттамасы белгілі. Өлшемі — 5195×1994×1875 мм, дөңгелек базасы — 2.9 метр. Негізгі жабдықтар тізіміне клиренсін 220 мм-ден 310 мм-ге арттыратын DiSus-P бейімді аспасы енеді. Leopard 8-дің кіру және шығу бұрышы сәйкесінше 34 және 35 градус болады.

Машина толық жетекті, жалпы 748 ат күшіне ие (760 Нм) екі электромотормен жүреді. Жол талғамайтын көлік алғашқы жүздікті 4.8 секундта еңсереді, ең жоғары жылдамдығы — 180 км/сағ. 36.8 киловатт батареяның арқасында машина электр қуатымен 100 км (бұрын 125 км деген ақпарат болған) жол жүреді, ал 2 литрлік дәстүрлі мотордың көмегімен жүріс қоры 1200 шақырымға жетеді.

Марка тұсаукесерде бұған дейін белгісіз болған бірнеше мәліметті жариялады. Мысалы, Leopard 8 алғашқы болып Huawei әзірлеген Qiankun ADS 3.0 «автопилотымен» жабдықталады, әзірлеушілер бұл жүйе қалада жүргенге тиімді екенін хабарлады. Борттық медиажүйені осы өндірушінің гаджеттерімен байланыстыруға болады. Leopard 8 медиажүйесі үш дисплейден тұрады, шетте — 12.3 дюймдік, ортада 17.3 дюймдік экран бар, сондай-ақ диагоналі 50 дюйм болатын алдыңғы әйнектегі проекцияны қамтиды. Жүйе BYD жасаған жеке чиппен жұмыс істейді.

Қытайда машина алты және жеті орынды төрт комплектацияда сатылады. Тұсаукесерде FangChengBao өкілдері флагман Еуропа нарығына шығатынын айтты. Машина Еуропада BYD концернінің құрамына кіретін Denza брендінің өнімі ретінде саудаға шығады.