BYD бір айда 507 мыңға жуық көлік сатты

Cnevpost басылымы күздің соңғы айында BYD маркалы 506 804 электрокар мен гибрид өтті деп жазды. Бренд осымен алты ай қатарынан рекорд жасап жатыр. Алайда алғаш рет гибрид саудасы азайғаны байқалды.

Былтырғы осы кезеңмен салыстырғанда сауда көлемі 68 %-дай өссе, қазан айындағы нәтижеден небәрі 0.83 % асыпты. Концерн бұл тізімге жолаушы таситын модельдерін де, коммерциялық техникасын да қосқан. Соңғысының 2.8 мыңы өтіп, 2023 жылға қарағанда 434 % нәтиже көрсеткен.

Жолаушы таситын 198 065 электрокар (+16.4 %), 305 938 гибрид (+133 %) иесін тапты, бірақ бұл қазандағы саудадан 1.6 % аз. Аналитиктер бұл 8 ай бойы көптеп сатылған гибридтің қарқыны бәсеңдеген алғашқы ай екенін атап өтті.

2024 жылдың қаңтары мен қарашасы аралығында Қытайдың аса ірі автоөндірушісі NEV клиенттеріне 3 757 000 машина жөнелтті. Он бір айда жолға шыққан электромобиль саны 2023 жылмен салыстырғанда 12.5 % көп. Ал гибридтің танымалдығы 70 % артқан. Биыл BYD 4 миллион автомобиль сатуы әбден мүмкін, өйткені Жаңа жыл жақындаған сайын нарық та жандана түседі.