BMW электромобильдерін Tesla станциясында қуаттауға болады

Бавариялық автоконцерн Supercharger желісіне қосылуға рұқсат алған автоөндірушілер қатарына қосылды деп жазды Carscoops. Осы мақсатта 2025 жылдан бастап бренд АҚШ пен Канадада саудаланатын электрлі және гибрид BMW, Mini және Rolls-Royce-ты NACS стандарына сай келетін құрылғымен жабдықтайды. Көлік иелері экраннан Tesla-ның қуаттау бекеті орналасқан жерді көре алады және қосымша арқылы онлайн төлем жасайды.

Бұған дейін Ford, GM, Volvo, Mercedes-Benz, Nissan, Jaguar, Hyundai Group, Rivian компаниялары Tesla қуаттағышының ыңғайлы, сенімді және көп тарағанын мойындаған, сонымен бірге жақында NACS жүйесіне қосылатындарын хабарлады.

Десе де шетелдік брендтер өз елінде бұрынғыша басқа қуаттау құрылғыларын пайдалана береді. Мысалы, Еуроодақ елдерінде Еуропалық комиссия бекіткен CCS жабдығын қолданады. Tesla бәсекелестері Солтүстік Америкада жеке қуаттау бекетін құру жоспарынан бас тартқан жоқ. Мұндай келісімге алты концерн қол қойған.