BMW алтыншы сериялы лифтбекпен қоштасты

BMW 6-Series GT-ден толық бас тартып, топтамадан модельдің соңғы модификациясын алып тастады. Бұл автомобиль 2017 жылы бестіктің орнына келіп еді.

BimmerToday порталы модель тарих қойнауына кетеді деген сыбыс шыққанын хабарлаған. Басылым көлік сұранысқа ие болмады, оны тек корпоративтік паркке қосу не қонақүйлер әуежайдан қонақ күтіп алу үшін алды деп жазды.

Компания 2022 жылдың қорытындысын жариялады. Туыстас седандар мен бесінші буынның универсал моделі ай сайын мың данадан тараса, Германияда 12 айда небәрі 509 GT өткен. Биыл көрсеткіш тіпті көңіл көншітпейді (237 авто).

Ел арасында BMW 6-Series GT шықпайды деген жел сөзден кейін марка басшылары ақпаратты ресми түрде растады. Motor1 порталына хабарласқан BMW өкілі «алтылық» GT-ді енді өндірмейтінін, автосалондарда қалған машиналар сатылып жатқанын мәлімдеді.

Концерн алтыншы серияның болашағы туралы ешқандай мәлімдеме жасамады.

BMW 6-Series GT Қазақстанда да бар. Дилерлер екі нұсқасын ұсынады: бірі — 252 ат күшіне ие 2 литрлік турбомотормен жүретін артқы жетекті 630i (31.6 млн теңге), екіншісі — 340 ат күшін беретін 3 литрлік агрегат орнатқан толық жетекті 640i xDrive (39.8 млн теңге). Ал екінші нарықта 29.5-39 млн теңге тұратын бірнеше автомобиль ғана көзге түсті.