2024 жыл Қазақстанның ресми автонарығы үшін сәтті жыл болды. Сатушылар былтырғы рекордтық көрсеткішке жете алмауы мүмкін, бірақ сегіз айдың қорытындысы 2023 жылғы нәтижеден 1 % ғана төмен, биыл жалпы 119 225 автомобиль өтті. Ал баға қалай өзгерді?
Қазақстанда автомобиль бағасының төмендеуі сирек кездеседі, бірақ кейінгі жылдары елде Қытай маркалары көбейді, бұл баға саясатына әсер етуі мүмкін. 2024 жылы дилерлер тиімді несие ұсынысы, ұзақ уақыттық бөліп төлеу және түрлі жеңілдік ұсынды. Нарықтағы танымал модельдер қазір қанша тұрады, биыл қаңтарда қаншаға сатылды деген сұраққа жауап іздеп көрейік.
Hyundai Tucson
2024 жылдың басында Қазақстанда Tucson төрт комплектацияда сатылды. 6 сатылы механика қорап және алдыңғы жетекті жүйемен жұмыс істейтін 2 литрлік моторы бар ең арзан кроссовер 12.7 млн теңге тұрды. Моторы осыған ұқсас, бірақ автомат қорабы бар нұсқасы 13.7 млн теңге болды, мұндай машина толық жетекті болса қосымша 500 мың теңге төлейсіз (14.2 млн теңге). Марка 2.5 литрлік қозғалтқышы бар автомобиль үшін 16.1 млн теңге, ал 2 литрлік дизельді мотормен жүретін машина үшін 16.6 млн теңге сұрады. 2.5 литрлік атмосфералы бензинді моторы бар Luxe жиынтығындағы үздік Tucson 18.6 млн теңгеге, 2 литрлік турбодизельмен жүретін машина 19.1 млн теңгеге бағаланды.
Ал қазір базалық Tucson қымбат тұрады. Бағасы 14.5 млн теңгеден басталады. Бұл ақшаға 2.0 литрлік қозғалтқышы бар, алдыңғы жетекті және автомат қорабы бар кроссовер алуға болады. Бұл түрленімнің бағасы 800 мың теңге өсті. Өйткені автомобиль жаңарды, қазір механика қорабы бар ең арзан түрленім саудада жоқ.
Ал Tucson-ның 2.5 литрлік қозғалтқышы бар ең қымбат Luxe нұсқасы 19 млн теңгеге бағаланып отыр, бұл биыл жыл басындағы бағадан 900 мың теңге жоғары.
Chevrolet Cobalt
Биыл жыл басында елдегі ең танымал седанның механика қорабы бар Optimum нұсқасы 6.6 млн теңге, ал автомат қорабы бар Elegant түрленімі 7.6 млн теңгеге сатылды. Тоғыз айда орташа және үздік комплектацияның бағасы өзгерген жоқ, ал ең қолжетімді нұсқасы 600 мың теңге арзандады. Қазір механика қораппен жабдықталған Cobalt 6 млн теңге тұрады.
Kia Sportage
Қаңтарда Sportage кроссоверінің бағасы 13.7–19.9 млн теңге болған. Модельдің ең қолжетімді Classic түрленімі автомат қорап және алдыңғы жетекті жүйемен жұмыс істейтін 2 литрлік мотормен жүреді. Тоғыз айда мұндай машина 200 мың теңге қымбаттады. Осыған ұқсас күштік құрылыммен жүретін Luxe нұсқасындағы автомобиль қазір 15 млн емес, 15.2 млн теңге тұрады. Яғни бағасы 200 мың теңге өскен.
Сондай-ақ 2.5 литрлік моторы бар толық жетекті Sportage 100 мың теңге қымбаттады. Үздік X-Line + түрленімін қазір 19.9 млн емес, 20 млн теңгеге аласыз.
Chery Tiggo 2
Жыл басында алдыңғы жетекті бюджеттік Chery Tiggo 2 түрлі жеңілдік пен арнайы ұсынысты есептемегенде 7.5 млн теңгеге сатылды. Ал жеңілдікті ескергенде автомобиль 7 млн теңге тұрды. Қыркүйекте Tiggo 2 жаңарып, атауына Pro қосымшасы қосылды.
Қазір әдеттегі Tiggo 2 7 млн теңге, ал жеңілдікті есептегенде 6. млн теңгеге сатылып жатыр. Марка Tiggo 2 Pro үшін 7.5 млн теңге сұрайды. Яғни жаңарған машинаның бағасы қаңтардағы рестайлингке дейінгі көлік құнымен бірдей.
Hyundai Elantra
2024 жылы Elantra седанының бағасы өзгерген жоқ. Дистрибьютор 1.6 литрлік моторы мен автомат қорабы бар машинаны 11 млн теңгеге, ал 2 литрлік атмосфералы моторы бар үздік Luxe нұсқасын 14.4 млн теңгеге сатып жатыр. Баға өзгермегенімен, Elantra-ны акциямен арзанырақ алуға болады. Компания модельдің Start нұсқасын 11 млн емес, 9.9 млн теңгеге, ал Luxe нұсқасын 14.4 млн емес, 12.95 млн теңгеге ұсынып отыр.
Бұған дейін Kolesa.kz елдегі ресми автонарықтың жағдайы жайлы метериал жазған. Онда 2024 жылы қандай жол талғамайтын көлік көп өткенін және электромобиль саудасы қалай жүріп жатқанын анықтадық.
Комментариев: 0