Биыл Қазақстанға Geely Emgrand келеді

Қазір Қазақстандағы Geely топтамасында төрт кроссовер бар, биыл жыл аяғына дейін ол қатарға седан қосылады. Бренд дистрибьюторы G-Motors Kazakhstan басшысы Виктор Нестеров «Китайские автомобили» басылымына Emgrand моделінің төртінші буынын сатуға дайындалып жатқанын хабарлады. Седан Қытайда 2021 жылы жарық көрген, кейін Беларусьте саудаға шықты.

Машинаның өлшемі — 4638×1822×1460 мм, дөңгелек базасы — 2650 мм. Ол жаңа Chevrolet Onix-тен сәл үлкен, ал JAC J7-ден сәл кішкене. Бюджеттік көлік болса да сәнді сырт пішіні, заманауи интерьері және сыйымдылығы 500 литр жүксалғышымен мақтана алады. Клиренсі — 122 мм.

1 / 8

• 
• 
• 
• 
• 
• 
• 
• 

1 / 8

Geely Emgrand өз елінде вариатормен жұмыс істейтін, 114 ат күшіне (147 Нм) ие 1.5 литрлік мотормен жүреді. Ал Беларусьте қозғалтқыш 103 ат күші мен 142 Нм береді, агрегат вариатордан бөлек 5 сатылы механикамен жұптасады.

Қазірше машинаның бағасы мен комплектациясы жайлы ақпарат жоқ. Бірақ Беларусь нарығына арналған Emgrand туралы айтуға болады. Комплектациясына байланысты седан мата немесе эко-былғарымен қапталған екі түсті салон, аналогты аспаптар панелі немесе 12.3 дюймдік дисплеймен жабдықталады, ал медиажүйе экраны бірдей 8 дюймді болады. Оптикасы — галогенді немесе жарықдиодты, дөңгелек дискісі — 15–17 дюйм. Салқындатқыш барлық жиынтықта бар.

Geely Emgrand Беларусьте 49.2–56.9 мың рубль (7.5–8.7 млн теңге) тұрады. Демек Қазақстандағы Chevrolet Onix пен JAC J7-ден айтарлықтай арзан, бірақ Geely Emgrand біздің елде Беларусьтегі бағамен сатыла ма, жоқ па, белгісіз.