Кеше Қырғызстан астанасында жергілікті шеберлер Kunan Taitoru спорткарын таныстырды. Көліктің ұлттық нақышта жасалғаны атауынан-ақ білінеді. Тайторы – «Манас» жырындағы сәйгүлік.
Жоба авторларының бірі Медер Койлубаев Taitoru өздері әзірлеген платформаға негізделгенін айтты. Шанағын композит материалдардан жасапты.
Моторы жүргізушінің артында орналасқан. Күштік құрылым ретінде Subaru Legacy-дің 300 ат күшін беретін оппозит қозғалтқышы таңдалды. Техникалық жағына қатысты басқа мәлімет жоқ, бірақ агрегат автомат қораппен жұмыс істейтінін аңғару қиын емес. Ол төртінші буындағы Legacy-дікі болуы мүмкін.
Taitoru-ның Subaru-ға бөтен емес екені салонынан да байқалады. Климат басқару блогын жапон маркасынан алған, көзге түсе қоймайтын тағы бірнеше бөлшек те соған тиесілі сияқты.
Авторлар бұл коммерциялық жоба емес дейді, сондықтан қазір осындай автомобиль сату жоспарда жоқ. Оның үстіне Taitoru тіркелмеген. Құжатқа қатысты мәселе туындаса да, команда көлікке нөмір алуға ниетті.
Комментариев: 0