Бірнеше трассада орташа жылдамдықты бақылау жүйесі іске қосылды

«ҚазАвтоЖол» ҰҚ АҚ мәліметінше камералар жылдамдық асырғандарды мына бөліктерде тіркейді:

• Астана — Щучинск (шектеу 140 км/сағ);
• Астана — Павлодар (шектеу 140 км/сағ);
• Шымкент — Қызылорда (шектеу 110 км/сағ);
• Шымкент — Тараз (шектеу 110 км/сағ);
• Павлодар — Семей — Қалбатау (шектеу 100–110 км/сағ);
• Орал — Ресей шекарасы (Саратов) (шектеу 100 км/сағ);
• Павлодар — Ресей шекарасы (Омбы) (шектеу 100–110 км/сағ).

Орташа жылдамдықты өлшеу және оны асырғандарға айыппұл салу былтыр 4 желтоқсанда Жол ережесі мен Әкімшілік кодекске өзгеріс енгеннен кейін басталды. Орташа жылдамдықты түзу учаскедегі камералар тіркейді және қашықтықты еңсерген уақытқа бөледі. Айыппұл мөлшері жылдамдықты қаншалықты асырғанына байланысты 5-40 АЕК арасында болады.

Аппарат тек осы жеті жолға емес, тағы бірнеше жерге орнатылған. Жалпы саны — 13. Бүгінге дейін олар сынақ режимінде жұмыс істеді.