Көлік құралының электрондық паспортына қатысты жаңарған ережені бекіту туралы бұйрықты Өнеркәсіп және құрылыс министрлігі жариялады. Құжат биыл 26 қазанда күшіне енеді. Осы күннен бастап электрондық паспорт жеке пайдалану үшін әкелінетін жеңіл көлік, шағын автобус, жеңіл жүк көлігі, квадроцикл, қарда, батпақта жүретін көліктер, мотобагги және тағы басқа техникаға рәсімделеді. Басқа импорт түрлері бұйрықта көрсетілмеген. Паспортты жылына тек бір машинаға ғана рәсімдей аласыз. Жүйе одан көп өтінім қабылдамайды.
Кедендік алым қанша болады
Еуразиялық экономикалық комиссия кеңесінің 2017 жылғы 20 желтоқсандағы № 107 «Жеке пайдалану үшін әкелінетін тауарға қатысты мәселелер туралы» шешімінде рекреациялық техника, сонымен қатар жалпы салмағы 5 тоннадан аспайтын шағын автобус пен жүк көлігі үшін салық пен басқа алым жиынтық кедендік төлем түрінде алынады деп жазылған. Кедендік баж салығы жеңіл көлік құнына қарай 48 немесе 54 % болады.
Қаржы министрлігінің Мемлекеттік кірістер комитеті Kolesa.kz редакциясына хабарлағандай, жеке тұлға әкелетін және жеке қолданылатын тауарға жататын көлік құралына қатысты кедендік декларация түрін таңдау құқығы әлі сақталады, яғни жеткізуші ЕАЭО-ның Бірыңғай кедендік тарифі (көлік құнының 15 %-ы + ҚҚС. — Kolesa.kz ескертпесі) немесе ЕЭК Кеңесінің № 107 шешімімен бекітілген мөлшерлеме (48 және 54%) бойынша төлем жасайды.
Демек халық әзірге тиімді мөлшерлемені таңдай алады. Әрине, 15 % тиімді, көп ойланудың қажеті жоқ. Алайда бұл мәселені алдағы уақытта министрлік талқылап, № 107 шешімде көрсетілген жоғары пайыздық мөлшерлемені міндеттеуі ықтимал.
Билік былтыр 1 желтоқсаннан бастап жеке тұлғаға жылына бір рет жаңа немесе қолданылған көлікті әкелуге рұқсат берген. Мұндай автомобильге көлік құралы құрылымының қауіпсіздігін растайтын куәлік алып, оны жеке қолданылатын тауар ретінде кеденде рәсімдеу керек. Кедендік төлем ішінде бұл норма әзірге толық жұмыс істемейді, ешкім 48 % төлемейді. Бірақ жаңа ереже күшіне енген соң елге кіріп жатқан машиналардың санын әлдеқайда мұқият бақылауға мүмкіндік туады.
Заңды тұлға жаңа автомобильді тек көлік құралы құрылымының қауіпсіздігін растайтын куәлік арқылы кіргізеді және оны ресми импорттаушылар ғана тіркей алады. Жеке дилерлерге басқа компаниялардың құжатымен машина әкелуге тыйым салынады.
Шыққанына 3 жылдан асқан қолданылған техниканы заңды тұлға мен жеке кәсіпкер көлік құралы құрылымының қауіпсіздігін растайтын куәлік арқылы шексіз тасымалдай алады, ол үшін Дүниежүзлік сауда ұйымының мөлшерлемесі бойынша шамамен 15 % кедендік төлем мен қосымша 12 % ҚҚС төленеді.
Комментариев: 0