Алматылық полицейлер қызық оқиғамен бөлісті. Оңтүстік астанада ломбардтарды алдап, 110 млн теңге пайда тапқан алаяқ құрықталды. Қаскөй жүргізу құқығын өзіне қалдырып, бір көлікті бірнеше ломбардқа кепілге қойған. Ұсталмас бұрын ол қарызға ақша беретін сегіз ұйымды алдап соқты.
Мұны қалай істеді дейсіз ғой. Тәртіп сақшыларының айтуынша, ол жалған VIN-код жасап, жалған құжат рәсімдеген. Көліктің шетелден келгенін растау үшін утилизациялық алым төлепті. Артынан жол талғамайтын көлікті тіркеп, нөмір алған да, ломбардқа жол тартқан. Машинаны өз атына емес, туыстарының атына рәсімдеуді де ұмытпапты.
Қазір күдікті қамауда отыр. Оның атына аса ірі көлемде алаяқтық жасады деген айып тағылып, Қылмыстық кодекстің 190-бабы, 4-бөлігі бойынша іс қозғалды. Полиция алаяқтың әрекетінен зардап шеккен адамдардың 8 701 655 55 54, +7 727 261 23 86 немесе 102 нөмірлеріне хабарласуын сұрайды.
Қылмыскердің арам ойын іске асыру үшін батыл қадамға барғанын айта кеткен жөн. Алайда бастапқы тіркеу барысында автокөлік тексерістен қалай өткен?
Комментариев: 0