Қазақстанда жол қауіпсіздігін арттыруға және жол инфрақұрылымы элементтерін нормативтік талаптарға сәйкестендіруге бағытталған ауқымды шара басталды. Көлік министрлігі хабарлағандай, Жол активтері сапасының ұлттық орталығы алдағы төрт апта республикалық маңызы бар жолдардағы барлық белгіні тексереді. Олар белгілер дұрыс тұр ма, техникалық күйі қандай, көріне ме, жоқ па, жол қозғалысын ұйымдастыру схемасына сай ма, соған мән береді.
Мамандар жөнделген жолды да назардан тыс қалдырмайды. Онда уақытша тұрған немесе ескірген жол белгілері, соның ішінде жылдамдықты шектейтін белгілер қалуы мүмкін. Қызметкерлер жарамсызын алып тастайды немесе жаңасына ауыстырады.
Министрлік тексеріс кезінде жол белгілері түнгі уақытта көрінетініне, жарық шағылыстыратын элементтердің бар-жоғына, олардың дұрыс орнатылғанына қарайды.
Ведомство қазір республикалық жолдарда 140 мыңдай жол белгісі бар деді. Олардың 10 мыңға жуығы жыл сайын жаңарып отырады.
Комментариев: 0