Бұған дейін ІІМ Қазақстанға 2022 жылғы 1 қыркүйекке дейін келген 200 мыңға жуық шетелдік автомобильді заңдастыру жоспарланып отырғанын мәлімдеген. Бүгін ҚР ІІМ Әкімшілік полиция комитетінің төрағасы Қайсар Сұлтанбаев 23 қаңтар мен 26 наурыз аралығында 69 мыңнан аса машина жеңілдікпен тіркелгенін айтты. Оның 67 %-ы (46 592 машина) Ресейден, 19 %-ы (13 424) Армениядан, 10 %-ы (6788) Қырғызстаннан, 2 %-ы (1296) Грузиядан келген.
Әкімшілік полиция комитетінің басшысы мемлекет тұрғындар тілегін ескеріп, «конструктор» деп аталатын көліктерді де заңдастыруға дайындалып жатқанын хабарлады. ІІМ тиісті қаулы жобасын әзірледі. Құжат алғашқы талқылаудан өтіп, мемлекеттік органдармен келісім жүріп жатыр, жақында үкіметке жолданады.
Қаулы жобасына сай заңдастырған «конструкторлар» Қазақстанда ғана жүре алады, оның үстіне мұндай машинаны өзге адамға сатуға болмайды.
Комментариев: 0