Шенділер биыл 23 қаңтарда басталған шетелдік көліктерді заңдастыру шарасының жаңа кезеңіне дайындалып жатыр. Билік ендігі кезекте Ресейге қосалқы бөлшек түрінде кіріп, кейін Қазақстанда Ресей тіркеуіндегі машина ретінде сатылған «конструктор-машиналарды» есепке қояды.
Polisia.kz порталы ҚР ІІМ Әкімшілік полиция комитетінің төрағасы Қайсар Сұлтанбаевқа сілтеме жасап хабарлағандай, ІІМ «конструктор» тіркеу шарты жазылған қаулы жобасын дайындады. Құжатты үкіметке жолдады, билік оған мамырдың басында қол қойып, жариялауы мүмкін. Құжат қол қойылған соң он күннен кейін күшіне енеді. Содан кейін полицейлер мұндай машинаны тексеріп, есепке қоя бастайды.
Заңдастыру шарасы басталғанға дейін ІІМ «конструктор» тіркеу мәселесінде қатаң позицияда еді. ҚР ІІМ басшысының орынбасары Игорь Лепёха мен ҚР ІІМ Әкімшілік полиция комитеті Тіркеу басқармасының басшысы Әлібек Кеңесбаев мұндай машинаны заңдастыруға болмайтынын айтқан. Кеңесбаев мұндай көліктің көбі Қазақстанда жалған техпаспорт, жалған нөмірмен жүргенін жеткізді. Билік елге қосалқы бөлшек түрінде кірген автомобильді тіркеуге тыйым салған. Бірақ жүргізушілер наразылығынан кейін полиция райынан қайтты.
Комментариев: 0