LaFerrari супергибриді 2013 жылы компанияның технологиялық жетістігін көрсетсе, клиенттер үшін нағыз олжаға айналды. Купе Ferrari модельдерінің ең жылдамы болды. Оның үстіне мүлде жол жүрмегендері де кездеседі. Париждегі RM Soheby’s аукционында 2016 жылдан бері 14 шақырым ғана жол жүрген LaFerrari сатылады.
Машина көп иінтіректі аспасы мен белсенді амортизаторлары бар карбон монококқа негізделген. KERS жүйесімен жұмыс істейтін 6.3 литрлік V12-мен жүретін модель брендтің алғашқы толыққанды гибриді болды.
Жалпы 963 ат күшіне ие күштік құрылым 1255 келі тартатын көлікке алғашқы жүздікті 3 секундта алып, жылдамдығын 352 шақырымға жеткізуге мүмкіндік береді. Суперкарды таныстырғанда жолға шығатын мінсіз Ferrari деп атады.
Компания 499 данасын шығаруды жоспарлаған, кейін 500 машина өндіретін болды. Соңғысын компания қайырымдылық аукционында саудалап, одан түскен ақшаны Италияда қатты жер сілкінісінен зардап шеккен халыққа аударамыз деп шешті.
Жақында саудаға түсетін купе 2016 жылы шыққан. тапсырыс берушінің қалауына сай шанағын ақ түске бояп, салонын қара алькантарамен қаптаған. Иесі мүлде жүргізбеген, тіпті есепке екі жыл өткен соң қойыпты. 2021 жылы одометрі 9 км көрсетіпті. Дегенмен техникалық тексерістен өткізіп, бүкіл аккумуляторын ауыстырған екен.
Аукцион үйі Ferrari флагмандарын ерекше жақсы көретіндер 3.7-4.8 миллион еуро санап береді деп үміттеніп отыр.
Комментариев: 0