Компания басшысы Стефан Винкельманн Direzione Cor Tauri (Торпақ (Taurus) шоқжұлдызындағы ең жарық жұлдыздың құрметіне қойылған) деп аталатын Lamborghini-дің даму стратегиясын таныстырды. Жоспар бойынша биыл V12 моторы қойылған соңғы екі машина жарық көреді, содан кейін Lamborghini брендімен шыққан көліктер электрлі болады. Онжылдықтың ортасына қарай барлық модельде CO2 шығарылымын екі есе азайту үшін Volkswagen бір жарым миллиард доллар инвестиция салады.
Алдағы үш жылда Lamborghini-дің қазіргі барлық моделі гибридке айналады. Сонымен қатар автомобиль шығару көлемі өзгермейді: Urus суперкроссовері ең танымал әрі негізгі табыс көзі болып қала береді. Винкельманнның айтуынша, Lamborghini инженерлері толық электрлі суперкар жасап жатыр. Бұл машина 2025 жылдан кейін жарық көреді.
Италиялық компанияның гибрид көлік шығаруда тәжірибесі бар. 2014 жылғы Asterion бензин-электрлі концептісінен кейін 2019 жылы Lamborghini Sian гибриді жасалды. 785 ат күшіне ие 6.5 литрлік V12 моторына қосымша 34 ат күші бар электрлі қозғалтқыш қойылған. Автомобиль тұраққа қою немесе артқа шегіну секілді төмен жылдамдықта жүретін кезде ғана электр жетекті пайдаланады. «Сианның» 63 купесі мен 19 родстері шықты.
Комментариев: 0