Bentley екінші кроссоверін дайындап жатыр

Осы айдың басында Bentley электромобиль сегментіне қатысты жоспарын жария етті. Компания алғашқы электрлі модель ретінде Luxury Urban SUV деп аталатын «аса сәнді қалалық жол талғамайтын көлікті» таңдапты.

Бренд таратқан ақпаратқа сүйенсек, ұзындығы бес метрге жетпейтін машина Bentayga-дан кіші, флагман SUV-ден әлдеқайда әдемі болады. Бұл кәсіби суретшілерге шабыт берсе керек, солардың бірі Audi Q6 e-tron-ды негізге ала отырып модельдің рендерін сызды.

Мини-Bentayga-ның алды кәдімгідей жинақы, өйткені оны компания 2022 жылы таныстырған Mulliner Batur эксклюзив моделіне қарап сызған.

Жаңа көлік 2026 жылы жарық көреді. Кроссоверге қатысты ешқандай техникалық мәлімет жоқ, бірақ ол Audi Q6 e-tron мен электр күшімен жүретін Porsche Macan сияқты PPE платформасында жасалады деген болжам бар.

Автоөндіруші жыл сайын су жаңа бір электромобиль немесе гибрид ұсынып, 2035 жылдың аяғына дейін Bentley-ді толығымен жасыл брендке айналдыруды көздеп отыр.