Батареялы BYD гиперкары Қытайдағы ең жылдам автомобиль атанды

BYD концерні Yangwang U9 электрлі гиперкары жақында екі үлкен жетістікке қол жеткізгенін хабарлады. Германияның Папенбург автодромында купе 391.94 км/сағ жылдамдықпен жүріп, Қытайдың ең жылдам сериялы автомобилі атанды. Электромобиль атақты Нюрбургрингте де жүріп көрді, бірақ аса керемет нәтиже көрсеткен жоқ.

1 / 4

• 
• 
• 
• 

1 / 4

Папенбургке купе сәл өзгерген түрде барды. Yangwang U9-дың аэродинамикасы жақсарған, ол үшін компания антиқанат пен жаңа алдыңғы сплиттерден бас тартты. Электрокарға жеңіл дөңгелек орнатып, электрониканың бағдарламасын өзгертті. U9-дың стандарт ең жоғары жылдамдығы — 306 км/сағ.

Нюрбургрингте BYD мамандары гиперкардың бар мүмкіндігін зерттеп, күштік құрылымы мен шассиінің ең тиімді параметрін таңдауға шамамен алты ай уақыт жұмсады. Электромобиль әлемдегі аса қиын жолдардың бірі саналатын трассада 20.8 шақырымды 7 минут 17.9 секундта жүріп өтті. U9 Xiaomi SU7 Ultra прототипінен жарты минут, Porsche Taycan Turbo GT-ден 10 секунд баяу болды, ал Taycan Turbo S және Tesla Model S Plaid-тен жоғары нәтиже көрсетті. Бұл трассада ең жылдам жүйткіген электрокар — Rimac Nevera (7 минут 5.3 секунд). Бірақ купе Нордшляйфті ең жылдам жүріп өткен BYD өнімі атанды.

BYD инженерлері 1306 ат күшіне ие гиперкарды рекорд орнату үшін емес, жүріс сипаттамасын реттеу үшін Нюрбургрингке апарған сияқты. Концерн U9-ды былтыр көктемде көрсеткен, бірақ өндірісі мен саудасын биыл күзде ғана бастады.