«Халық бақылауы» жобасы аясында Балқаш — Бурылбайтал тас жолының 1855–1905 шақырымынан ақау табылды. Жалпы ұзындығы бір км болатын жеті жол бөлігінде ойық, шұңқыр және басқа ақаулар пайда болған.
«Бұған жазда ауа температурасының шамадан тыс жоғары болғаны (маусымда +40-тан +45 ℃-қа дейін) және жолда ауыр жүк көліктерінің көп жүргені әсер етті», — деді «Қазавтожол» ҰК. Олар Балқаш — Бурылбайтал трассасы шөл дала арқылы өтетінін, ол жерде жылда 40 градустан аса ыстық болатынын ұмытып кеткен сияқты. Ал елдің оңтүстігі мен солтүстігін жалғайтын тас жолда «жүк көліктері көп жүргеніне» де таңғалудың қажеті жоқ. Өйткені трассаны солар үшін салған.
Жол бөлігіне берілген кепілдік мерзімі биыл қарашада аяқталады. Мұнда асфальт 2021 жылы төселді. Мердігер өз есебінен бүлінген жолды тегістеп, асфальттың жоғарғы қабатын қайта төсейді. Бұл жұмыс 10 тамызда басталады. Мұның пайдасы бола ма? Екіталай! Өйткені ақауға көбінде сапасыз асфальт жабыны емес, дұрыс қаланбаған төменгі қабат себеп болады.
Жауапсыз қалған тағы бір мәселе бар, кепілдік мерзімі аяқталған соң келер жазда жол тағы бүлінсе кім жөндейді? Өйткені алдағы жазда да қатты ыстық болатыны, ауыр жүк көліктері жүретіні анық.
Комментариев: 0